Tun kum November hla ah Palestinian heh UN ah dinhmun sang sawn ah hlen hnua ah tun heh laivum ai pawlkom poimawh te pawl te thawn pehzomhnak bawn tuhin zuam vivo ii. Palestinian in pehzom a tumhnak pawlkom te lakah Universal Postal Union (UPU), World Intellectual Property Organization (WIPO), the United Nations Environment Programme (UNEP) le World Health Organization (WHO) te pawl tlawn tum ii.
Israel ai Foreign Ministry in hetih bang ai Palestinians in pawlkom dang pehzom a tumhnak ah pawlkom omhmun ram ai Israel Ambassador te hmang in cia pawlkom headquarters te hnen ah lungkhim tuh loin mer tum ve ii. Israel in hebang pawlkom te in Palestinians lang lekhaw laivum remhnak hnok ruai tuh ai a laukuul thu rel ii.
Palestinians in pawlkom dang ah tel tum thula ah US mithmai heh poimawh ngai ii. Tun ai US daan ah UN hnia ai pawlkom song in UN ah ram ihnak dinhnak nai loin PLO le pawlkom dang ah tel thil lo tihnak daan nai ii. Cen, US in he pawlkom te pawl ca sumpai 22% pe tio ve ii.
Israel official lam in a lingdaan ah Palestinian in pawlkom dang ah lut thil tuhin US daan heh thleng ruai tuhin Palestinians rualpui le pawlkom te pawl in nor tum ti ii. Israel lam in US daan thleng tuh loin Washington ah cang thil tawpin rolh tum ii.
Tun tian Palestinians in UN ah a tel hnua United Nations Educational, Scientific and Cultural Organization (UNESCO) ah member in tel hang ii. Hetin UNESCO in Palestinians tel ruai maan US in UNESCO hnen ah kum siar $80 million a pe tiohnak October 2011 pah com hang ii.
info