Kawlram acozah in Chin state ai Falam township ai om Surbung tlang ah ramsong vanzuang khophmun bawn tuhin ruathnak nai ai Chin National Front (CNF) palai te pawl in Falam Township acozah hotu te thawn he hmun heh 2012 Dec 19 nia ah siik tlang ii.
He zingzoihnak heh CNF ai Supreme Council Chairman Pu Dr. Za Hlei Thang konghoihnak le acozah thawn vaihnihhnak tawkdunhnak ai palai te pawl in Surbung tlang vanzuangkhophmun heh zingzoi tuhin acozah thawn pon dun cia hnak ii.
Tun naai ah CNF le acozah in Rangoon ah avaihnihhnak tawkdunhnak ah Surbung tlang ah vanzuangkhophmun dinh tuhin lungkhim tlang ii.
Cetin acozah lam in palai U Than Zaw hlat ai 2012 Oct 26 nia ah Surbung tlang siik tuhin hlat ii.
Falam ai acozah upa in, “He heh International bangin bawn tuh,” ti ii.
CNF palai te pawl in Surbung tlang a siik fangin lungto ah English in nganhnak 5.12.1907 tihnak khai tawk ii. He hmun heh tunhlan British san ah khai zingzoihnak om zo i tuhin umhnak nai ii.
Tunhlan ai he hmun ah vanzuangkhophmun thula zingzoihnak heh Burma Socialist Programme Party (BSPP), State Law and Order Restoration Council (SLORC) le Development Council of Burma (DCB) ai hotu te pawl in bawn awng zo ii.
He hmun ah 1976 kum pah acozah hotu te pawl in siik zo ii. Falam ai Pu Thang Kim in, “Department ai director heh kin hlat tuh ai hmailam ah fumfe in tawlrel tuh daan te khai kin reel tuh,” ti ii.
Acozah lam in vanzuangkhophmun heh a saulam 8,000 feet, a kaulam 200 feet in bawn tum ii. Sagaing division ai Kalaymyo vanzuangkhophmun heh a saulam 6,000 feet ian ii.
info