Tun teng Kachin state ah acozah le Kachin Independence Organization (KIO) te tawngduhnak roh tete le acozah in jet vanzuang hmangin tawng ii. Kachin ralkap le acozah tawngdunhnak ah mipui zonzai in harsa ze maan United Nations ai Secretary General Ban Ki-moon in 2013 Jan 2 nia ah mi harsa te bawm tuhin Kawlram acozah ngen ii. Kawlram acozah in jet vanzuang hmangin KIO a tawnghnak heh tun zarhkhat khim zo ii.
Zarh hmasa ah UN ai HUmanitarian Affairs ca Under-Secretart-General pervo naitu Valerie Amos in Kachin state ah mipui harsa te pawl heh tun bang khua dap ze caan ah harsa ze in om maan a ngaihtam thu President Thei Sein hnen pon zo ii.
Kawlram acozah in KIO hmunpui ber hmailam ai hmun poimawh Laija Yang heh roh ngaiin tun naai ah tawng ii. He hmun heh KIO hmunpui an mile 8 dung ah om ai he tawngdunhnak maan raltlan in mipui 25,000 om zo ii. 2011 kum June hla pah an acozah thawn tawngdunhnak maan mipui 75,000 dung raltlan in om zo ii.
Kawlram ai tlangvum miphun te dinhnak UNFC (United Nationalities Federal Council) in January 1 nia ah Kawlram acozah hnen ah KIA thawn tawnduhnak heh comhnak thu suah tuhin ngen zo ii.
Tun teng Kawlram heh khuadap caan ii ai Kachin ram heh vur hnak in dap sawn in om le mipui raltlan te pawl heh hamlak ah khuadap tuar in harsa ngai in om ii. Kachin nupang pawlkom KWAT in raltlan te lakah naupang le pitar-putar te pawl heh roh ze in khuadap tuar thu phuang ii.
KIO le Kawlram acozah in remhnak bawn tuhin pondunhnak heh acozah palai Minister Aung Min thawn nikum October 20 ah tawkdun zo le thula in remhnak bawn tlang tuhin rel tlang zo hnak om ii. Cia thu heh November ni 9 ah lungkhim thu rel tlang zo ai tun baan acozah in KIO a tawnghnak com lai lo ii.
info