Israel ram ai Jews miphun in Lantak Puai (Passover) bawn caan ah khaukhuap thawng tam roh Israel ram ah dim maan Israel tluanthu ai Egypt ram ah harsahnak phun 10 hleng awnghnak tun a takin tawk maan Bible thawn pehzom roh ti ii.
Tun zarh song Israel ram ah khaukhuap tam roh hleng ai Passover bawn dawn caan dung ii. Jews mi million tam roh in tunhlan ai Egypt ram ah a luat awnghnak hihhlenhnak tun kum ah a bawn teng ah Israel ram vei lam nelrawn ram khiah khaukhuap in dim berh ii.
Israel ram ah tun bangin khaukhuap pung lo hnak a rai zo ai a hnuataber heh 2005 kum ah i awng ii. Tun tum khaukhuap tam dan heh lampui ah motor mawng fangin hmailam siik thil loin hlalang heh khaukhuap in dim sek ti ii.
Acozah in khaukhuap te pawl heh si in kaap vual ii. Palestinian ram khai khaukhuap in dim ai acozah in Hebron khua le West Bank vei lam tian kaap ii. Egypt ram khai khaukhuap maanin lo rong hnawm bial ai mi pakhat in dollar million tam ngai man a lo ai rong hnawm sio ii. Egypt ai Cairo khuapui ah khuakhuap heh million 30 dung umh ti ii.
Khuakhuap pung ze maan harsa tuar bertu heh Sudan ram ii. UN ai FAO pawlkom in tun ai khaukhuap pung ze in a laukuldan heh Egypt ram ai laivum tiva sau ber mile 621 (1,000 km) tluk sau Nile tipui hiang ai lo ram te khai tun May hla song ah siatsuah berh thai tiin ralring tuhin phuang zo ii.
Khaukhuap heh amah te rit zah nisiar rong ai ben ii. Cen, ni khat ah mile 80 zuang ben ai, 200 million per square mile tia a dim in pung ben ii. Khaukhuap nu in 10 square feet tia song ah ti 1,000 ti ben tiin FAO in phuang ii.
Khaukhuap ton 1 in rong heh mi 2,500 in ai hnak rong heh ni 1 song ai khawng sek ben tiin UN FAO in phuang ii.
Hetih bang ai midang te buai lai ah Israel in khaukhuap heh tun kum Passover ah danglam in hmang tum ii. Israel in tun ai khaukhuap heh maisa in hem in rong aipha in bawn tuh sawn ii. Zaimaan tifangin khaukhuap in protein tam ngai nai maan ii.
info